John 15

Iesu tom i e Au na Wain Tekentu

1“Iau tom e au na wain tekentu, ma Tata i e tom parpar kale mok na wain. 2I bus ufu la e foron akan au tikii lo iau ae biil ri fua la. Ma i sifi foron akan au tikii ae ri fua la, isi rik lala fua. 3Gam ka tapiek fuuh tah, wara na foron orek ia fas ta gam ini. 4Gam patep lo iau, ma iak patep lo gam. Biil ti akan au i fasih in fua foes kia tom. Biil. In patep tom na au na wain. Ifasih sau arae gam, biil i fasih gamen fua, le biil gam patep lo iau.

5“Iau tom e au na wain, ma gam foron aka. Male seh i patep lo iau ma ia ka patep lo, ke in lala luun fua. Male biil gam patep lo iau, ke biil i fasih gamen tel ti tier. 6Male seh biil i patep lo iau, ke i tara sau arae akan au ae ri lin ufu, ma ka mang. Foron matngan akan au arae ri sik turim ri, ma ri ka lin ri una yiif ma ka sok. 7Male gam patep lo iau, ma foron orek kiak ka kiis sing gam, gamen sising isi sanih gam ier isi, ke gamen kep u. 8Tata in kep memeh aunbiing gam lala fua, ma fua gam in finngas u le gam berberat na fafausum kiak.

9“Tata i ier kanaka tah isi iau, arae iau sabin ia ka ier kanaka isi gam. Ke, gamen kiis na palgan famais kiak. 10Male gam misuut na foron nagogon kiak, ke gamen kiis na palgan famais kiak, arae sau ia misuut tah na foron nagogon ke Tata, ke ia ka kiis tah na palgan famais kia. 11Ia ka fas ta gam ini foron tier igii, isi laes kiak, ik kiis na balmi. Ma laes ae, ik kuruung tikii gam. 12Igii e nagogon kiak usuf gam: Gamen famais faliu ini gam, arae sau ia mais ta gam. 13Biil ti famais ken tikas, i laumet na famais ke ier ae i lin liu kia isi foron tala. 14Gam foron talang, male gam tel foron sanih ia use u. 15Biil mang ian foteng gam arae foron fafauun. Biil. Wara le, nenge fafauun, biil i usum na foron foim ken laulaumet kia. Isau le ia ka foteng ta gam arae foron talang, wara le, foron tier tikii ia ongen ta u sing Tata, ia ka famalal ta u usuf gam. 16Biil gam tim pes ta iau. Biil. Isau le iau tom ia tim pes ta gam ma ia ka tus pes ta gam isi gamen la ma gamek fua. Ma fua gam ik tih fitliu. Ke Tata in ta foron sanih gam sising u na asang. 17Igii e nagogon kiak: Gamen famais faliu ini gam.

Fanu na Piklinbat ri Ememse foron Berberat na Fafausum

18“Male fanu na piklinbat ri ememse gam, ke gamen wol pesu le ri ememse famu ta iau. 19Male gam tina piklinbat, ke rin ier kanaka isi gam arae kiri tutus tom. Isau le gam biil tina piklinbat, wara le ia ka tim pes ta gam tina piklinbat. Pesu, fanu tina piklinbat ri ka ememse gam. 20Gamen wol pes foron orek ia fas ta gam ini, ‘Biil ti fafauun i laumet lon laulaumet kia.’ Male ri falaulau ta iau, ke rin falaulau gam sabin. Male ri misuut tah na fafausum kiak, ke rin misuut sabin na fafausum kimi. 21Isau le rin ememse gam, wara na asang. Wara le biil ri usum lo seh i wuun ta iau. 22Male biil ia la tah uga ma ia ka fas ta ri, ke biil rin sir kunan sinang laulau kiri. Isau le igii, ia ka fas ta ri, pesu biil ti sal kiri una fun sinang laulau kiri. 23Seh i ememse iau, i ememse Tata sabin. 24Male biil ia tel ta foron foim tah na palga ri ae biil biitom tikas i tel ta u, ke biil rin sir kunan sinang laulau kiri. Isau le igii, ri ka par ta u e foron rakrakai na fakileng ia fatapiek u, isau le ri ka ememse ta kamah turim tom e Tata. 25Isau le ri ka tel foron tier igii, una fasuut orek ae na Buk na Gogoh le, ‘Ri ememse foes ta iau.’

Buk Song 35:19

26“Ian wuun ufu Tom Falupes tinbae sing Tata, i e Tanwan Tekentu. Aunbiing in la tinbae sing Tata, ke ik famalal gam ini iau. 27Ke gam sabin, gamek famalal fanu ini iau, wara le gam kiis tah turang tina aunbiing ia tipes foim.